حزب الكنبة
نفس الوشوش
نفس الكروش
نفس النفوس اللي قالت
متثوروش
رغم السقوط المبتذل للطاغية
لسه بكل بجاحة بيهتفوا
مبيزهقوش
قاعدين في بيتهم في الدفا
لا داقوا نار الضرب و الرصاص
مجربوش
و مجربوش
حرق قلوبنا ع الضنا
متغيروش
رغم اللي كان ؟
مشافوش وقوفنا قدام الجبان ؟
كل اللي فات كل اللي جاي
كل اللي حواليهم بيصرخ من سكات
متغيروش
أما هما .. فزي هما
لا أتاثروا
شايفين
لكن ساكتين
و الدماغ بيكبروا
و كأننا شوية كلاب بيهوهو
يقولوا ثورة ايه يا ناس ؟
طب يرضي مين ده يا ناس ؟
شوية عيال عايزين بلادنا يغيروا ؟
لكنهم متغيروش
نفس الكلام
و كأنهم حافظينوا
مبيفهموش ؟
و إن قلنا خايفين
طب من أيه ؟
أكتر من اللي فات
راح ييجي أيه ؟
ظلم و إهانة و تعبية كروش
طب فاضل ايه
علشان تدافعوا عننا
هو أنتوا مش مننا
اللي جابوكوا كانوا مننا
نفهم بقى و نتغيرو إلا هتاكلنا الوحوش
ليست هناك تعليقات:
إرسال تعليق